4. juli hadde bloggen eit års dag! Gratulera til meg sjølv! Det har vore eit spennande år, der eg har prøvd meg fram med forskjelleg på bloggen. Tusen takk til deg som leser trufast innpå her, og til dei som dumpar innom. Eg er både på facebook, twitter og instagram, viss du vil følgje med.
Ha ein fantastisk, varm og god sommar, slik me pleier på Vestlandet… 😉
-Gudrun-
Eg og min andre (vil slett ikkje kalle han bedre) halvdel var i by’n (Bergen, ja) og henta ei gravemaskin i helga. Der var me òg på shopping (jaaa, særleg!!) og min mann kjøpte seg ei ny arbeidsbukse. Ei grøn arbeidsbukse. Han er 37 år, har drive eige firma i 15 år og jobbar no saman med to gutungar på nokon-og-20, begge har teke fagbrev hjå han. Det seier litt om maktfordelinga, ikkje sant, kven er sjefen, trur du? Men allikevel var han litt bekymra i dag, for å reise på jobb med den nye, grøne arbeidsbuksa. Han kom til å verte mobba, meinte han.
Dette fekk meg til å tenkje på «å tore å skille seg ut». Kvifor må alle vere like? Kvifor må me passe inn i ein boks? Eg skal ikkje påstå at eg skiller meg ut heile tida, men eg er ikkje så redd for kva folk meiner. Eg likar å skille meg litt ut, av og til, iallefall.
Men korleis skal me få ungane til å tore å skille seg ut, tore å vere seg sjølv? Tore å ta på seg den grøne arbeidsbuksa? Korleis skal me utfordre oss sjølv til å vere litt annleis? Er det ikkje der kreativiteten startar? På utsida av komfortsona?
Skal verte eit av mine forskingsprosjekt i sommar. Vert du med? Skal me forske litt saman?
To be continued….
Sommarklem,
-Gudrun-
Det er ferietid for mange, også for oss. Me er då ein familie med ei mamma (meg), ein pappa, ei storesøster på 11, ein mellombror på 8 og minsten på tre. Planen er då å reise på ferie, alle fem samla, i ein bil og med ei campingvogn.
Kom med dine all-time-favoritt tips for at foreldra skal overleve bilturen, i ein trang bil med høglydt krangling.
Frå min eigen barndom hugsar eg lange bilturar med storebroren min i midten, sikkert som buffer, og eg og veslesyster mi på kvar si side i baksete. Me hadde (vekselsvis, trur eg) glaset ope, og eg og syster mi (2 år yngre enn meg) sang ganske samstemt (*knegg*) alle sangane me kunne, mens mamma, pappa og broren vår (6 år eldre enn meg) antakeleg rett og slett overlevde.
Men korleis skal eg og gubbis overleve?
Eit tips er å køyre om natta, då søv antakeleg iallefall to av ungane, problemet her er at gubbis (som har lov å køyre med campingvogn, noko eg ikkje har) også pleier sove/sovne på natta… Altså utgår det alternativet.
Eit anna tips kom storesyster på 11 med i dag; spel ein cd som både eg og mellombror likar… Ja, det var jo enkelt å finne, og kva då med tre åringen, som skriker minst like masse som søskena?
Eit tredje tips er evt å legge ferien til Kjørnes camping (dvs 15 min køyring frå heimen) Men då vert det jo ikkje særleg mykje nytt å sjå…
Har du noko andre gode tips? Dvd-spelar, kanskje? Må i tilfelle ha tre stk med tre forskjellige filmar 😉 Ein ting eg iallefall har lært den harde vegen; IKKJE for dei med snop og chips! Det betyr KRIG i baksete. Satsar nok heller på bær, frukt og grønsaker.
Elles så kan jo eg og 11 åringen byte plass i bilen, men mor i huset er den som taklar bilkøyring dårlegast med tanke på bilsjuke.
Har du tips som er heilt geniale og funkar som fjell på bilturar? Ver snill og del dei med ei små-desperat mor, og alle andre som treng det.
Med takknemlegheit,
-Gudrun-
Eg og poden på 8, og faren, har litt problem med lesebøkene på skulen. Me finn det litt meiningslaust og lese desse tre orda i fire forskjellege samansetningar, men me har slite oss gjennom det i heile andre klasse. Og det har gått greit nok, bortsett frå at me har fått beskjed om å lese i sommarferien òg.
So kjem utfordringa då; kva kan me lese? Når 8 åringen veldig bestemt kunngjer at han ikkje skal lese noko som helst. Læraren føreslo at me kunne lese Leseløve-bøker om fotball, for det var han interessert i. (Åååjaaa? Er han interessert i fotball?? Det kom som ei overrasking på meg!)
Men ein barnepsykolog gav meg eit mykje bedre tips; google og lag tekstar sjølv utfrå interesser. Han ville forresten lage jonsok-bål av lesebøkene som skulen brukte òg; Eg diggar han!
Eg kom heim og begynte å google, og fann ein liten, kort tekst på bokmål, om gravemaskiner på wikipedia. MEN nederst stod det noko om at teksten var kort og mangelfull, men at ein kunne lese meir (og oversetje viss ein ville…) på nynorsk wikipedia **Yuhuu**!!!! Eg hadde fundert litt på korleis eg skulle gjere det, for eg tykkjer det er litt viktig at han les nynorsk, og her ligg det jo masse spennande på NYNORSK!!
Så no har eg altså, ved hjelp av wikipedia og word, laga nokre ark, som me kan lese på i sommar. Eit tips til alle andre som treng litt lesetrening i sommar! Eg har tips til dei som treng mattetrening òg 😉 Men det får du berre på førespørsel.
Ha ein flotte sommar, med masse lesing. Eg og dotter mi på 11 leser nok for heile nabolaget, har laga meg ei lita leseliste i sommar, for å få litt meir oppbyggande litteratur enn den vanlege kiosklitteraturen eg ofte fell tilbake på 😉 Kanskje eg skal lage eit lite innlegg om leselista mi òg? Det er bøker om både sjølvutvikling og sjølvinnvikling, så det kan verte spennade, og litt om små barn 😉
Klem,
-Gudrun-