Kategoriarkiv: foreldretips

Min adventskalendar; 6. desember – peppermyntegriser

foreldretips, jul

Fredag <3

snø

Det er taco-dagen over alle, også her i heimen. Men i dag vil eg dele ei oppskrift på mintgriser. (Grunnen til at det vart griser, er at me har nokre knøttsmå pepperkake former, der i blant ein gris) Oppskrifta fekk eg hjå Ann Kristin i fjor, min tidlegare Virrevapp.no-sjef.

griser

Ann Kristin sine mint griser
1 dl kremfløyte
1 ss kveitemjøl
Kok til tjukk jevning.
10 dråpar peppermynte + konditorfarge.
Tilset 500 g melis når det er avkjølt.
Kna saman til deig,
kjevle og trykk ut med små
pepperkake-former.
Smelt sjokolade og stryk over figurane.

Dei smakar kjempe godt! Eg skal gi deg oppskrifta på mamma sine mintstenger òg. Julemint er nydeleg!

-Gudrun-

Min adventskalendar; 5. desember – sjokoladekake

foreldretips, jul

Det snøar, Big Time, i Dalen i dag. I går var eg og gutane ute og sklei og laga snølykter (som vart både nedsnødde og vekkbrøytte, men det er ikkje nøye). Eg og minsten som har fri frå barnehagen i dag, bakar sjokoladekake (som står nedom her) og skal ein tur ut og brøyte før me skal på Tae Kwondo gradering!

Så i dag heiar eg på mellom guten i familien. Han er 8 år og skal graderast i tae kwondo i dag! Hurra!

snø

Då er det på plass med ei enkel platekake, som er rask og enkel. Takk til Karin, som var styraren min i gamle dagar for den geniale oppskrifta!

Langpannekake
6 koppar mjøl
4 koppar sukker
4 egg
2 koppar mjølk
300 gram smelta smør
3 ts bakepulver
3 ts vaniljesukker
2 ss kakao
Bland alt, rør kun med visp, ikkje mixmaster.
Steik på 180 grader i 30 min.

SJOKOLADEKAKE

Ferdig kake

Kaffi og sjokolade

Prøvesmaking…

Denne er grei å ty til når du skal ha bake-dugnad, t.d. til tae kwondo-gradering og slikt. Og viss du brukar o’boy i glasuren istaden for kakao, vert den lys og fin – så veit du det 😉

Hugs å nyte førjulstida. (Eg innrømmer glatt at førjulstida skjeldan vert koseleg for meg, eg stressar som ein gal. Men i år er eg tidleg ute 😉 Prøver eg stadig å overbevise meg sjølv om – i god NLP-ånd)

-Gudrun-

snø

Utsikten frå stoveglaset i dag tidleg, koseleg å sitte inne og sjå på snøen med kaffikoppen og vite at du ikkje treng køyre bil på Dalavegen i dag 😉

Min adventskalendar; 4. desember – rundstykker 1

foreldretips, jul

I dag fyller eg opp frysen med rundstykker. Kjekt å ha heimebakt til julefrukostane.

snø

Begynner med oppskrifta frå Bestemor <3

Eg var so heldig at eg hadde besteforeldre på verdas vakraste øy, Bømlo. Kvar gong me kom til Lykling, fekk me desse gode rundstykka. Dei smakar best med rørt jordbærsyltetøy 😉 (Jepp, barndomsminne <3 )

 Bestemor sine rundstykker

1 l mjøl
1 ts salt
4 dl mjølk
4 barneskreier sukker
4 ss smør
1 pk gjær

 Smelt smør, ha den i mjølka. Rør gjæren ut i sukkeret.
Bland alt og rør forsiktig, ingen elting.
Trill ut lange pølser som kuttast opp i ca 32 stk.
Set ferdig trilla bollar til heving i ca to timar. (Ingen forheving)

 Steik i ca 10 min 200-225 grader

Bestemor bakte som sagt desse som me fekk til frukost, då eg var 12 år gammal, døde ho. Bestefar var enkemann i 16 år, men held tradisjonen ved like. Ganske imponerande av ein mann på 76 år.

Takk for gode minner <3

-Gudrun-

Min adventskalendar; 3. desember – juleverkstad

boks, foreldretips, jul, kreativitet, vinter

I dag trur eg rett og slett det vert julemusikk, julekaker og julegodis frå 1. og 2., gløgg og juleverkstad med mine tre små/store. Me har funne fram glanspapir og perlebrett og skal lage julepynt.

snø

Det er koseleg å ha både små og store ungar saman. Dei store kan lage litt meir utfordrande pynt, og dei kan hjelpe dei små.

Desse papirstjernene til BareBeppe har gått som ein farsott på instagram. Dei er kjempe enkle, og svært dekorative.

juleverkstad1

Slik ser det ut på bordet når me startar.

juleverkstad2

Men det eskalerer fort.

juleverkstad3

Her er litt av resultatet; ein boks, eit kort og tre deler til stjerna.

Det vart fem av BareBeppe sine stjerner, to boksar (kjem forklaring i ein seinare post), 4 julekort og sikkert noko meir som eg ikkje kjem på.

(Eg skal vere ærleg; me gjorde dette i går 😉 For å få med bilder ligg me ein dag føre. Tysdagar er ikkje dagar der me har tid til noko ekstra. Ungane kjem att med skulebussen kl 15, og me skal gjere lekser, levere veslebror til barnevakt og komme oss på trening til kl 17. Storesøster har tae kwondo-trening, mens eg og storebroren har, som eg muligens har sagt noko om før…, klatring. No er det øyeblikkeleg Bratt-kort på a’ mor!)

Kos dykk i førjulstida. Juleverkstad er kjempe moro, iallefall etter at me har lagt den yngste 😉 Kva lagar du til jul?

-Gudrun-

Min adventskalendar; 2. desember – sjokolade karameller

foreldretips, jul

Så var det måndag. Eg delte karamell-oppskrifta mi i fjor, og tenkte at eg skulle gi deg jenta mi si oppskrift i dag. Kjempe gode, og heilt annleis enn mine. Desse vert meir sprø og smeltar på tunga.

snø

Hilde sine karameller

210 g sukker
210 g glukose (apoteket)
30 g smør
3,3 dl fløyte
50 g sjokolade
Kok sukker, glukose, smør og fløyte til den er lysebrun,
rør med visp.
Ta gryta av plata og tilset sjokoladen.
Rør godt og hell straks over på matpapir.
Kutt i bitar når den er kald.

I desember kosar me oss, det er greit! Viss du prøver oppskrifta, fortel oss korleis det gjekk! Sant det vart gode karameller?

Kos deg i adventstida <3

-Gudrun-

Min adventskalendar; 1. desember – italienske julekaker

foreldretips, jul

Det er søndag, og første lyset er tent. (Viss du har funne att staken frå i fjor, vel og merke…)

Eg har ligg godt an i år, pga. stæroperasjonen har eg vore heime frå jobb, og dilla litt då. (Ikkje sant i det heile teke, eg ligg aldri godt an til noko som helst…)

snø

Så desember skal brukast til førjulskos i år <3 Har plan om det kvart år, å bruke desember til kos, og her kjem min 1. desember idè;

Eg fekk smake nokre fantastisk gode italienske julekaker på ein førjulsfest på skulen, så her kjem oppskrifta på desse <3

deig

Sarah sine julekaker

250 g mjøl
125 g smør – mjukt, smuldre
110 g sukker, ha i mjøl/smør
1 egg + ei ekstra plomme
Ha i mandel, hasselnøtt og sjokolade.
Deigen skal vere fast, la stå kaldt i ein time.
Kjevle ut og stikk ut kaker med pepperkakeformer.
Steik på 150 g til dei har fått farge.

Eg prøvde desse i fjor, mine vart ikkje så gode som dei eg smakte, men det trengs vel litt prøving og feiling før ein finn den rette blandinga med nøtter og sjokolade.

italienske julekaker

Nyt førjulstida, viss du prøver oppskrifta, fortel meg kva du tykkjer! 😀

-Gudrun-

 

Dei tre Bukkane Bruse

boks, drama, dyr, foreldretips, magisk boks, samlingstips, små barn

Dokketeater er moro, sjølv om dokkene er laga av tomme dorullar. Forrige veke fekk eit åringane møte «Dei Tre Bukkane Bruse», med 4H-prosjekt-dorullane som «dokker» og ein smilande glitterbamse som troll 😉

dorull

Me hadde andre møte i dag, ungane elskar samlingsstunda! Dei spring til kroken når dei ser samlingsboksen. Det einaste andre som har samme virking er om det kjem mat på bordet 😉 Då òg kjem dei unisont springande…

Eg tok berre med Bukkane som ein liten prøve forrige veke, tenkte det vart for avansert for eit åringane å følgje med på eventyret. Men når dei fekk det visuelt med dokkene, pluss litt drama frå stemme og ansiktsuttrykk, sat dei som spikra. Det var fantastisk å sjå kor med dei var.

Bukken-Bruse

Vesle Bukken Bruse, trippa over trollebru.
No tek eg deg, sa trollet, og var so grum i hu.
Nei og nei ta ikkje meg, eg er tynn og liten eg,
han som kjemme etter, mykje meire metter.

So gå då, sa trollet

Mellom Bukken Bruse, trampa over trollebru.
No tek eg deg, sa trollet, og var so grum i hu.
Nei og nei ta ikkje meg, eg er tynn og liten eg,
han som kjemme etter, mykje meire metter.

So gå då, sa trollet.

Store Bukken Bruse, TRAMPA over trollebru.
No tek eg deg, sa trollet, og var so grum i hu.
Eg er ikkje redd for deg, berre kom, eg stangar deg.
Pang og pang det skramla, stygge trollet ramla.

Store Bukke Bruse stanga trollet ned i vatn,
so no går Bukken Bruse so glad på sætervang.
No er denne visa slutt, bukkane går ofte ut,
dansar over brua, opp til sæterstua.

Tekst: Arvid Höglund (svensk)

Eg skal ikkje lyge på meg at me har sunge denne sangen med eitåringane, men det er ein sang me kan ta opp. Akkurat som Tre små griser, er dette jo heile historien i ein sang. (Dog litt meir avansert tekst)

Alle Killebukkane

Alle Killebukkane på haugane sprang,
spurde om Karin var heime.
Mamma til Karin ho svara JAAA!
Og alle Killebukkane dei vart so glad,
dei klakka seg på låret og sa HAHAHA!

Mamma til Karin ho svara NEEII!
Og alle Killebukkane dei vart so lei,
dei sprang inn i skogen og gøymde seg.

Kva tykkjer du; er det enklare å fortelje eventyr med rekvesita, eller vil du at ungane skal lage eigne bilder? (Kan dagens unge lage eigne bilder?)

Sler eit slag for dokketeater og dramatisering i dag, viss du tykkjer det er flaut med dei andre vaksne; Hugs på kven som har betalt for å sjå deg, og kven som faktisk har betalt for å sjå på deg… Kven skal du ta mest hensyn til..??

I går klatra eg forresten opp i klatreveggen (12 meter) på led!! Dvs at eg knipsa meg inn på veg opp, og ikkje var festa i toppen! Jepp, er GRISESTOLT, så eg forteller det til ALLE!! Eg trudde ærlegtalt at eg ikkje var sterk nok, men det var eg!! Yuhuu!! (Jadå, veit at det var ørlite off topic, men eg berre MÅTTE fortelje deg det…)

Klem frå Spiderman, aka Gudrun

 

 

 

 

Nytt liv til ein dorull.

ferie, foreldretips, kreativitet

4H er ein flott organisasjon. Eg tok sjølv plaketten for eit par år sidan, og no er jenta mi i gang med sitt tredje år som 4H’ar. (ÅÅÅåååå, hugsar de landsleir i Innvik, Søgne og Ørje og Nordiskleir i Finland og Lyngen… Ja, ja, nok om det. Men til notidas 4H’arar; Reis på leir!!)

Vel, hausten for ein 4H’ar er alltid travel. (Egentleg skal det vel ikkje vere spesielt mykje meir travelt, men slik var det for 25 år sidan og slik er det no) Men, sidan me no brukar haustferie/fugle-sjukmelding til å gjere ferdig årets prosjekt, tenkte eg at dette må eg no vel kunne utnytte på ein eller annan måte.

Som tenkt, så gjort! No har eg tre Bukkar og tre griser og ein ulv, som eg kan bruke i samling, evt. saman med dokketeateret mitt.

Man tager nokre dorullar, tomme.

Bretter litt ned på toppen, slik at du får «øyrer».

Måler i passande fargar.

Slik vart dei ferdigmåla. Me manglar hale på grisane og ulven, samt horn på bukkane. Dette skal me lage med tråd. Vart dei ikkje søte?? Så enkelt, så genialt!

(Ja, har fått litt hang-up på dei tre små grisene….)

Del gjerne med andre som treng enkle idèar til gjenbruk og aktivitet med barna <3 -Gudrun- (Facebook)

Alle fugler små de er… Eit innlegg om takknemlegheit og rausheit.

foreldretips, oppstart, tankespinn

…kommer ei tilbake.

I dag har eg operert eine auga mitt for grå stær. Og er veldig spent på om dette vert bra. Slik det ser ut no, ser eg greit på avstand og ikkje noko særleg på nært hald. Så i løpet av nokre minuttar, har eg altså gått frå å vere svært nærsynt til å verte langsynt. Er heilt fantastisk at det går an.

Eg diskuterte med ei venninne i dag, kor flott helsevesen me egentleg har. Eg betalte rundt 300 kroner, og thats it, pluss litt augedråpar. I USA er det så dyrt å gå til lege viss du ikkje har dei rette, dyre, forsikringane, at dei ventar veldig lenge med å gå til lege. Me klagar ofte på at det ikkje er godt nok, men veit me egentleg kor godt me har det. Fødekvinner i Tanzania, som føder i flokk og ligg i sovesal med 30 andre, er super glade for å komme seg dit. Her klagar me, uansett kor trygt og godt me har det.

Takknemlegheit og rausheit var ord me brukte masse i dag. Finne det me er takknemleg for, og vere raus med oss sjølv og andre. Alt treng ikkje vere perfekt, og alle er faktisk ikkje like gode på alt. Men det er OK. Viss alle jaktar på det gode i andre, og fokuserer på det som er bra, trur eg verda vert ein bedre stad. Me gjer det litt slik på jobb. Me tok ein runde på kva me likar å gjere, og kva me ikkje likar, for å finne ut kvar me er. Tykkjer det er greit å starte med når me planlegger hausten.

Og for å avslutte med ein skikkeleg god opplevelse, som viser at det er bra å ha kompetanse på det du jobbar med uansett kor du jobbar, og som viser kor lite som skal til for å glede to vaksne damer. Oljelampa begynte å lyse på veg til sjukehuset, og me stoppa innom ein bensinstasjon for å få tak i olje. Me hadde opna panserert og funne ut kor me skulle peile og kor me skulle fylle, men me var ikkje så veldig høge i hatten. Men der opplevde me noko som me ikkje hadde forventa, den kjekke, unge mannen som jobba på bensinstasjonen, tok på seg hanskar og vart med oss ut for å fylle, utan at me bad han om det. Ein super start på dagen for oss! Og eg trur jammen det var fint for han òg, for me takka hjarteleg.

Så kan du kanskje seie at å skifte olje er noko me burde kunne sjølve, og det kunne me òg i utgangspunktet fått til. Men det diskuterte me faktisk òg i dag, me kan ikkje vere like gode i alt, så kvifor ikkje hjelpe kvarandre med det me er gode på?

Dette hadde ikkje mykje med sang å gjere, men det har mykje med livet å gjere. Ver raus og takknemleg.

-Gudrun-

Det er alltid to spørsmål som vert stilt.

foreldretips, tankespinn
Den gyldne regel

 

Eit innlegg om sjølvkjensle og sjølvtillit.

Korleis svarer du på desse spørsmåla? Eg veit at eg ikkje alltid svarer slik eg vil, men ved å verte meir bevisst på mine svar, kan eg verte flinkare til å gi den bekreftelsen barnet mitt (og andre relasjonar) vil ha.Spørsmåla er;
  1. Er eg elska? Er du glad i meg? (sjølvkjensle)
  2. Dug eg til noko? Tykkjer du eg er flink til dette? (sjølvtillit)

På eit rett ut spørsmål, er dette veldig enkelt å svare på. Men å hugse at det er desse to spørsmåla, om sjølvkjensle og sjølvtillit, som ligg bak når poden slår seg vrang, og då gi det rette svaret, er verre med.

Eg skreiv jo om ros i forrige post, fordi eg held på å lese «De utrolige årene». Og så har eg snakka med den tidlegare nemde barnepsykologen att, han med jonsok-bål av lesebøkene, veit du. Og han snakka om dette her, at alt egentleg bunnar i desse to spørsmåla, er du glad i meg? Og tykkjer du eg duger?

Hugsar me dette då, når ungen står og ramskriker at han vil ha saft? Eller når han, i mine auger, oppfører seg urimeleg? Når han set seg på bakbeina og ikkje vil legge seg? Eller når ho skrik og slamrar med dørane?

Øyøyøy, vanskelege saker, men viss me tel til 10? Går litt ut av situasjonen, ser litt objektivt på det? Me greier det då?

Avtale med meg sjølv; Prøv å sjå godt etter kva som ligg bak, kva barnet egentleg meiner, og svare på det. Og alltid tel til 10!! (Fekk ein test MENS eg skreiv innlegget…. Om eg «svara» rett, veit eg ikkje, men eg vart iallefall ikkje sint. **Flink**)

På eit kurs me hadde i fjor, om bl.a. «Tryggheitssirkelen», fekk me ei litt fin regle.

«Å vere ein god forelder kan oppsummerast i 25 ord: Alltid være: større, sterkare, klokar og snill. Når det er mogeleg; følgje barnets behov. Når det trengs: ta ansvar og bestemme.»

Og for å få inn litt sang òg, så avsluttar eg med ein av babysang-favorittane mine:

 

Du er så fin og eg bryr meg om deg.
Du er så fin og eg bryr meg om deg.
Ingen er så fin som du i heile verda.
Ingen er så fin som du i heile verda.

Føler dette vart eit litt personleg innlegg, men eg reknar med at det er fleire enn meg som kranglar med ungane mine, og som har lyst til å late det vere, og heller klare å telje til 10 og vere ein god forelder. Blir veldig glad for kommentarar og tilbakemeldingar, anten her eller på Facebook. Skal snart begynne å synge att på bloggen 😉

-Gudrun-

 rosehagetorn