Alle innlegg av Gudrun

Larver og sommarfuglar

august 29, 2014bok, drama, foreldretips, nettbutikk, samlingstipsGudrun

Eg har, overraskande nok (eller ikkje overraskande i det heile tatt, i og med at eg likar boka så godt at eg har kjøpt fleire hundre Lille Larven Aldrimett handdokker), valt boka om Lille Larven Aldrimett som første bok i haust. Eg har lese ho, for heile gruppa, to gonger i samlingsstunda. Ungane sit som tende lys.

Det er litt diskutert dette angåande å lese i samlingsstunda, men så lenge den vaksne som les gjer det underhaldande nok, går det heilt fint.

Korleis gjer du det underhaldande nok?

1. Du kan boka så godt at du ikkje er bunden av teksten, dvs at du kan lese boka mens du viser ungane bilda.

2. Du bruker deg sjølv, stemme, kroppsspråk osv, mens du les. Du speler litt skodespel fpr ungane mens du les. Eg hadde hengt opp eit eple, to pærer, tre plomer, fire jordbær og fem appelsiner på veggen. Desse klipte eg ut av papp og laminerte. Og så brukte eg handdokka Larven Aldrimett og åt meg gjennom frukta på veggen. For å få inn litt tal, talte eg kvar frukt, eit eple, ein, to pærer, ein, to, tre plomer osv.

3. Sjå på ungane, få augekontakt og fang dei inn i historia. La alle ungane kjenne seg sett.

Larven Aldrimett

I boka om Lille Larven Aldrimett kan me finne masse læring.

Vekedagar; Larven Aldrimett et seg frå søndag til søndag.
Tal; Larven et seg frå eit eple til fem appelsiner.
Sunn mat; laurdagen et Larven Aldrimett alt for masse og får vont i magen. Dei andre dagane et ho frukt.
Fargar; kva farge er det på frukta?
Natur, teknikk, miljø; Korleis Larven Aldrimett utviklar seg til ein sommarfugl. Ungar og vaksne. Me skal ha Larven som tema på gebursdagskalendaren vår i år; ungane skal vere larver og dei vaksne skal vere sommarfuglar.
Osv. Kom gjerne med dine tips i kommentarfeltet.

Bestselgar

Larven Aldrimett vart som forventa bestselgaren i nettbutikken, i den grad ein kan seie det etter så kort tid og med relativt få varer. Men Larven Aldrimett er jo spesiell då, kanskje fordi dette er ei bok me kjenner frå då me var små, og så er boka minst like populær no. Det er kjekt å lese ei bok du sjølv høyrde når du var lita, til dine eigne små. Eg reknar med at det er grunnen til at nettopp denne dokka slo så pass godt an. Både barnehagefolk og foreldre kan gjere lesestunda mykje meir spennande med denne dokka, den vert ein skikkeleg bestevenn. Mine toåringar krever at dokka skal ha ein koserunde kvar gong ho er framme.

Kva er dine favorittbøker? Kva alder passar dei til? Larven Aldrimett passar godt frå 2 år, andre favorittbøker er Store Monster gret ikkje og Vesle Monster seier nei, som òg er fine frå 2-3 års alderen. Bøkene om Moi, 2-3 år og oppover, Pål-bøkene er fine første bøker, for 1-2 åringar. Eg har mange favorittar! Ja, og Vrimlebøkene! Sluttar no 😉

Kos deg med kjekke lesestunder. Lik gjerne samlingsboksen på Facebook, og del bloggen med andre viss du likar den <3

Klem,
-Gudrun-

Barnehagetilvenning? Foreldreråda

august 21, 2014oppstart, små barnGudrun

Det er tilvenning i barnehagane rundt om, og mange foreldre kjenner seg litt usikre på dette med barnehagetilvenning. Dette er noko eg ofte får spørsmål om, og i dette innlegget har eg samla mine tips til barnehagetilvenning.

1. Stol på personalet. Det er ein grunn til at dette rådet kjem som første råd. Ungen din leser deg, og støttar deg på det han/ho les. Viss du ikkje stolar på personalet, stolar ikkje ungen din på dei heller. Personalet har betalt for å hjelpe deg og ditt barn, dei vil det beste for dykk. Stol på dei!

2. Fortel personalet korleis du vil ha det. Personalet les ikkje tankar, det er like mange meiningar og ønskjer som det er foreldre. Dei som jobbar i barnehagen ønskjer å gjere det slik at tilvenninga vert best for dykk. Nokon foreldre vil at personalet skal ta barnet mens det skrik, mens nokon ønskjer å roe ned barnet sitt sjølv. Fortel personalet korleis du vil at det skal gjerast, og ikkje bli irritert om du må fortelje det til dei fleire gonger. Tilvenninga er hektisk for personalet òg.

3. Ta til deg personalet sine råd. Dei som jobbar i barnehagen, har eit meir objektivt syn enn det du som foreldre har. Råda dei gir, er råd frå pedagogisk kunnskap, frå erfaring frå mange barnehagetilvenningar og frå observasjonar av ditt barn. Personalet vil det beste for dykk.

4. Uenig i noko? Ta det opp med personalet, ikkje med naboen. Eit godt samarbeid går begge vegar, ver med å legg eit godt og ope samarbeid frå starten av. Ikkje føl det som klaging, konstruktiv tilbakemelding er mykje bedre enn baksnakking.

5. Du er eksperten på ditt barn, du veit kva han/ho tåler. Ikkje gløym at det er ditt barn, du kjenner han/ho best. Følg hjarta ditt. Det som funkar for ein, funkar ikkje for ein annan.

6. Ta den tida du treng. Her kjem litt «inside information», det er foreldra sitt behov. Det er du som styrer tilvenninga, barnet ditt reagerer på dine signal.

Er du enig med meg? Mine tips er litt anleis enn dei vanlege tipsa du les over alt, om korte dagar og egentleg fri frå jobb ein månad. Samfunnet er ikkje opplagt til det, du har rett på dine tre dagar, og det er det. Lykke til med tilvenning alle saman, del viss du trur andre kan ha nytte av bloggposten, og legg igjen ein kommentar viss du vil diskutere eller fortelje om eigne opplevingar.

Her er innlegget til personalet når det gjeld tilvenning.

Klem,
-Gudrun-

Dikte sjølv – om dikt og fanteri

august 13, 2014drama, dyr, kreativitet, nettbutikkGudrun

Gründer søstre

Syster mi er god på språk, og ho har ei forfattarspire i magen. No prøver me så smått (eller egentleg veldig stort, sjølvsagt) å skape oss noko eige. Eg med samlingsboksen og ho med si bedrift www.helviktekst.no. Me hjelper kvarandre og heier på kvarandre. Me gir kvarandre tips og oppmuntring.

Eit av Rønnaug sine tips til meg, var å dikte mine eigne historiar til dokkene mine. Eg tenkte opplegg i samlingsstunder med ein gong, og skreiv innlegget om Bjørnen og Reven og følte meg stolt. Jau, sa ho då, men du må gi dokkene liv, gi dei karakter, dikte dine eigne historiar.

Eg har funne 4 historiar om Bjørnen og Reven, som er på planleggingsstadiet, og har funne ut korleis Sjiraffen Laffen egentleg er, han er litt sjenert, men likar godt samba (Berre spør Karin og Veronika, som tykte det bar over i samlinga i dag.)

Dei tre små griser

OG eg har dikta oppatt eventyret om dei tre små grisene og ulven. I går las eg det for min eigen fire åring, og i dag las eg det for 35 ungar i barnehagen, mellom 2 og 6 år. Og det gjekk rett heim! Det var so moro. Både ungane og dei vaksne var med.

Eg starta med å presentere grisene, Puslegrisen, Sporty Bust og Pelle Gris. Og så ulven, som har fått det flotte navnet Missjø Knit Grybin, du skjønnar at han er fransk, sant?

Og så bygde eg opp historia, stal litt frå Bukkane Bruse og litt frå historiar eg høyrde då eg var lita, om korleis Ola (min granonkel) lurte tyskarane under krigen. Og slutten var ei stor overrasking på meg, sjølv om det var mi historia. Slik er det nok å dikte, å vere forfattar, du veit liksom ikkje kor det endar før det er slutt.

Og det er moro å legge inn litt overraskelsespunkt her og der. Flette inn litt som ungane gjenkjenner, og dei vaksne. Som laurdagsgodteri og økologiske grønnsaker, utan å røpe for mykje….

Og du heilt til slutt, ungane gav meg spontan applaus når eg var ferdig, og ville ha meir… Lever på den ei stund!

Kor du kan få tak i eventyret, seier du? Jau, du får det med når du bestiller i butikken.

Kos deg, og lykke til med eit nytt barnehageår!

Klem,
-Gudrun-

Bjørnen og reven

august 7, 2014drama, dyr, kreativitet, nettbutikk, samlingstipsGudrun

Handdokker av dyr; larve, rev, bjørn, sjiraff — Handdokker; Bamse Brakar, Sjiraffen Laffen, Larven Aldrimett, Mikkel Rev

Bjørnen og Reven har som du kanskje har sett, flytta inn i nettbutikken min. Det er sjølvsagt mogeleg å bruke Bjørnen og Reven kvar for seg, men i dette innlegget vil eg sjå på korleis du kan bruke dei i lag.

Folkeeventyr

Desse to karane, Bjørnen og Reven, er dukkar ofte opp i folkeeventyra våre, som eit radarpar, der den dumsnille og lettlurte Bjørnen vert lurt av den slue luringen Reven. Bjørnen havnar alltid i trøbbel, og det er alltid Reven si skuld.

Eg dramatiserte eventyret om korleis Bjørnen vart stubbrompa til minstemann i går, han slukte det rått, og gav både Bjørnen og Reven godnattkos etterpå.

Sosial kompetanse

Eg meiner du her har mange muligheiter til å diskutere med ungane kva venner er. Korleis oppfører venner seg mot kvarandre? Er det greit å lure vennene sine?

Du kan prøve å sjå saka frå to sider, saman med ungane. Sette seg inn i både Bjørnen og Reven sine ståstadar.

Korleis trur du Bjørnen føler det når han alltid vert lurt? Korleis er det å få skulda for noko som andre har gjort? Som ikkje er din feil i det heile teke, kjenne litt på urettferidgheitskjensla.

Og Reven, kvifor vil han alltid lure Bjørnen? Korleis er det med samvitet hans? Tykkjer han det er morosamt å lure Bjørnen heile tida?

Korleis føler Reven det når han ser Bjørnen utan hale, og veit at det er sin feil?

Fine samtalar

Du kan få mange fine samtalar med borna kring dette. Viss du òg får med deg ein makkar og dramatiserer for ungane (sjå her for innlegg om dramatisering). Då kan de kle dykk i brunt og oransje, slik at de vert Bjørnen og Reven, og bruke dokkene som ein forlenging, la historia utspele seg gjennom dei. Dramatisering er veldig virkningsfullt, ungane lever seg inn i det, og dei kjem til å ta parti.

Her er eit innlegg om Bjørnen som eg skreiv i vinter

Kva ville du brukt Bjørnen og Reven til? Kommenter gjerne, og hugs å dele bloggen viss du likar han.

Klem
-Gudrun-

Bjørnen og Reven som handdokker — Bamse Brakar og Mikkel Rev

Korleis tilrettelegge for ein god oppstart?

august 4, 2014haust, oppstart, små barn, tankespinnGudrun

Korleis kan ein gjere tilvenninga i barnehagen best mogeleg?

Dei fleste ungar byrjar i barnehagen når dei er rundt eitt år, og eg vil ikkje gå inn på diskusjonen om barnehage er bra for eittåringar eller ikkje. Eg vil heller fortelje litt om kva me gjorde i fjor haust, då me ved oppstart fekk 11 eittåringar på avdelinga, alle heilt ferske barnehagebarn.

1. Me gira ned. Alle dei vaksne sette seg ned på golvet, og laga plass til dei som trong det på fanget, det kunne til tider verte trongt. Me hadde overhovudet ingen fancy planar om ting me skulle gjennom. Me hadde eit mål og ein plan; å gjere ungane sitt møte med barnehagen så godt som mogeleg.

2. Song. Me song for ungane, heile dagen. Me skapte gode augneblikk. Er det eit oppstartstips eg vil trekke fram, så er det; SYNG!

3. Leikar med lyd. I starten så hadde me leikar med lyd i overflod. Funka fint som avleiing. Høyrest rart ut, men lydleikane var til god hjelp i oppstarten.

4. Tid og rom. Bruke barnehagen, uterom og innerom. Me skifta beite, var det mykje skrik inne, kledde me på oss og gjekk ut. Når ungane var leie og skreik ute, gjekk me inn. Eit sceneskifte hjelpte ofte på humøret.

5. Tilpassing. Med 11 ungar på mellom 11 og 16 månadar, hadde dei sjølvsagt ikkje like rutinar. Me hadde mat og soving heile dagen den første tida, slik at alle skulle få mat, og alle skulle få sove når dei trong det. Me prøvde ikkje å få ungane inn i same rutine, men let dei behalde si rutine, sjølv om me hadde matservering heile dagen.

6. Tilknyting. Så langt det let seg gjera, fekk ungane velje kven dei ville vere med. Så la me vaksne av oss alle våre såre kjensler, kontakten med alle kom etterkvart.

Lykke til med oppstarten alle søte små, alle foreldre og alle tilsette. Kjenner du nokon som kan ha nytte av tipsa? Del gjerne bloggen vidare! Og del i kommentarfeltet om du har gode tips andre treng.

Klem
-Gudrun-

Dumb ways to die

juli 26, 2014tankespinnGudrun

Ungane kjøpte seg iPad før ferien, og ein hit i sommarvarmen har vore eit spel som heiter Dumb ways to die. Eg kjenner spelet kun ved kjenningsmelodien, og kan ikkje uttale meg om kva det går ut på. Men det handlar iallefall om dumme måtar å dø på, reknar eg med.

Dumme måtar å leve på

Kjenningsmelodien på spelet, som eg har høyrt både frå baksetet og inne i campingvogna, får meg til å tenkje på dumme måtar å leve på. (Ja, det er ein svært irriterande song!! ;))

Eg og nokre venninner starta ein boksirkel tidlegare i år, der me les bøker me kan lære noko av. Den første me las, var var «Bli best med mental trening» av Erik Bertrand Larssen. Så du skjønnar sjangeren.

No les me Dale Carnegie si bok «Lev livet uten bekymringer», ei bok han gav ut første gong i 1944. Den norske oversettinga er frå 2010, så det er ikkje berre me som les gamle bøker.

Dette er den dagen da jeg vil vere lett å ha med å gjøre. Jeg vil ta meg så godt ut som jeg kan, kle meg skikkelig, snakke lavt, handle høflig, gi rikelig med ros, ikke kritisere noen, ikke finne feil hos noen, ikke søke å rette eller dirigere noen. (s 145)

Boka handlar om å kvitte seg med unødvendige bekymringar, og leve livet på den beste måten uansett kva som hender. Det er aldri for seint å begynne på nytt. Og uansett, så er bekymringar berre eit energisluk som ikkje tjener deg i det heile teke.

Eg treng å lese slikt! Og er trur slett ikkje eg er åleine om å ha unødvendige bekymringar! Til dømes før kvar einaste legetime, trur eg at eg er kjempe sjuk. EG! Eg har knapt hatt feber i vaksen alder og veit ikkje kva influensa er. Og viss gubben er for sein heim frå jobb (noko han har vore kvar einaste dag i snart 20 år), trur eg at han har krasja bilen og er kjempe skada, eller død.

Krasja bilen trur forresten han at eg gjer kvar dag òg. Høyr no her, for 12 år sidan var eg høggravid (veke 36) og førstegongsfødande. Eg var ikkje heime då vatnet gjekk, eg ringer heim til gubben, og hue-gaular i telefonen, sjølvsagt. Og kva spør han meg om; «Har du krasja bilen?» Jepp, bil er det einaste mannfolk bekymrar seg for, heldige som dei er!

Her i vår fekk eg vont i ryggen. Eg gjekk som vanleg inn på Google og søkte «Vont i halebeinet». Og der dukkar «og kreft» opp som alternativ før eg har tenkt tanken. Så det viser vel at det slett ikkje er berre meg som bekymrar meg i tide og utide? Sidan det er er eit so vanleg søkeord at Google føresler det, meiner eg.

Greit nok at fæle ting kan skje, eg seier ikkje at det er ingen som får kreft, eller at ingen krasjar i trafikken. Men det er mykje sant i uttrykket; «Livet mitt har vore fyllt av tragiske hendingar. Dei aller fleste av dei har ikkje skjedd!»

Og det hjelper meg ikkje å takle fæle ting bedre om eg har bekymra meg aldri så mykje på førehand. Ein er aldri førebudd uansett.

Førebur meg på det verste, då vert eg ikkje så skuffa

Det er dei som trur dei får det bedre med å førebu seg på det verste, for då vert ikkje fallhøgda så stor. Men eg trur ikkje det. Eg ville ikkje fått det bedre viss eg forventa det verste heile tida, då ville eg jo fått det fælt alltid. Mottoet mitt er; «Eg har det mykje bedre mens eg ventar, viss eg håpar på det beste.»

Viss du førebur deg på at det skal gå bra, sparer du deg for bekymringane i ventetida, om det er ei ventetid du veit om, eller ei ventetid du ikkje er klar over. Då kan du heller ta slaget når det kjem, då har du iallefall ikkje kasta vekk verdifull tid i førekant. Og viss det går bra då, tenk så bortkasta bekymringane har vore!

Vær positivt innstilt og gjør det du skal med godt humør, og du vil føle deg glad.
Dale Carnegie

Dette flotte motivet fann eg i nærområdet mitt, det er enkelt å la seg bryte ned, men du er like vakker uansett.

Ha ein fortsatt fin sommar. Likar du bloggen, så del den med fleire <3

Klem,
-Gudrun-

And the winner is…

juli 24, 2014UncategorizedGudrun

Trekningen av Sjiraffen Laffen er gjort, og berre slik at de veit det, det var heilt rettferdig, heilt tilfeldig og alle hadde akkurat like stor sjanse til å vinne.

Eg og sjiraffen smiler søtt framfor vår nyaste bil.

Eg føler eg må understreke det, sidan vinnaren drypper litt på meg.

Vinnaren er

Hildegunn Bergheim

Ho skreiv; « Skulle brukt han til å skapa magiske samlingar!;) slik som du er så god på Gudrun!:)» Og det er her dryppinga kjem inn, for me jobbar saman, og då får eg vere med og sjå hennar magiske samlingar!

Gratulerar så mykje!

Klem, Gudrun

Introduksjonstilbod!!

juli 19, 2014drama, dyr, kreativitet, nettbutikkGudrun

Reprise; Haustferietilbod, varer ut veke 41! Porto vert 150,- med sporing.

Hoppar i det, før eg er klar! Hand- og fingerdokkene mine på pakketilbod, fram til 15. august eller så langt lageret rekker.

prisar og tilbod

Pakkepris; Bamse Brakar, Mikkel Rev, Sjiraffen Laffen, Larven Aldrimett, Ulven og dei tre små Griser, inkl korg kr 650,- (enkeltvis kr 975,-)

Bamse Brakar, Mikkel Rev, Larven Aldrimett, Sjiraffen Laffen inkl korg, kr 550,- (enkeltvis kr 775,-)

Bamse Brakar, Mikkel Rev, Sjiraffen Laffen inkl korg kr 450,- (enkeltvis kr 600,-)

Bamse Brakar og Mikkel Rev inkl korg kr 325,- (enkeltvis kr 400,-)

Lille Larven Aldrimett inkl korg, kr 200,-

Sjiraffen Laffen inkl korg kr 200,-

Enkelt prisar;

Handdokke eller sett med fingerdokker; kr 175,-

Korg; kr 50,- 75,- el 100,- (alt etter størrelse)

Frakt etter posten sine takstar.

For bestilling send mail til gudrun @ samlingsboksen . no (utan mellomrom) eller ta kontakt på tlf 97170239, helst pr sms eller på ettermiddagstid. Når eg er på jobb, kan eg sjølvsagt ikkje ta telefonen, då er eg oppteken saman med ungane. 😀

Klem Gudrun

Sjiraffen Laffen – gir alltid blaffen

juli 16, 2014bevegelsessang, drama, dyr, ferie, foreldretips, kreativitet, nettbutikk, samlingstips, små barnGudrun

Teaterdokkene til samlingsboksen.no har som sagt endeleg funne vegen til Sogndal. Først ute var ein boks med sjiraffar, endeleg kom Sjiraffen Laffen, det var kjærleik ved første blikk. Så forelska vart eg at eg til og med har lagt ut selfie på instagram, eg som aldri publiserer bilder av meg sjølv.

Sjiraffen Laffen er ein av mine (mange) favorittsongar, så min første tanke når eg fekk sjiraffen i hendene var, sjølvsagt, Sjiraffen Laffen. Første dagen gjekk eg og fire åringen rundt og song heile dagen. Naboen sa at gutungen hadde sunge Sjiraffen Laffen til dei òg, då han var borte og leika med venninna si.

Så begynte eg å tenkje, det var rimeleg snevert å ha ei teaterdokke kun til Sjiraffen Laffen? Dokka var jo så fin, ho måtte kunne brukast til noko meir. Då fekk eg den geniale idèen å spørje mine følgjarar, her på bloggen, på instagram og på facebook. Og eg fekk mange flotte forslag.

Portveien 2

Alle som vaks opp omtrent samtidig med meg, veit kven Raffen i Portveien 2 er, den gode sjiraffen som gøymde seg for Eli og Jarl, men dukka opp slik at me ungane fekk sjå han. Me som vaks opp med 20-30 minuttar barnetv kl 18 på NRK, hadde litt felles oppdragelse. Dei som veks opp no, har fleire titals kanalar å velje mellom, som sender barneprogram heile døgnet.

Men iallefall, fleire av mine søte hjelparar, ville brukt sjiraffen på samme måte som Raffen i Portveien, ein usynleg, for ho, gjest som dukka opp i samlingsstunder i barnehagen og tøysa bak ryggen hennar.

Sjiraffspråket

Eit anna forslag på korleis sjiraffen skulle brukast, tykte eg var så flott at eg måtte sitere det.

Hadde eg vunne en giraff til meg og mine ville den fungert som informasjonssjef i heimen. Han skulle fortalt om dagens planar og vore lydhøyr for ungane sine ynskjeleg om dagens innhold. Måtte vore ein perfekt måte å starta dagen på etter frukost. Samstundes ville den nok blitt sentral under lese stund og oppsummering av dagen før legge tid med masse kos og klem å gi og få av både meg og ungane.

Den amerikanske psykologen Marshall R. Rosenberg har utvikla ein kommunikasjonsprosess som me på norsk har kalla sjiraffspråket. Sjiraffen har lang hals, som han får god oversikt med, store øyrer som er gode å lytte med, og eit stort hjarte med plass til mykje empati. Eg har virkeleg tenkt å ta i bruk sjiraffspråket oftare, og verte meir anerkjennande i min måte å kommunisere på. (Spesielt heime….) Eg skal skrive eit innlegg berre om sjiraffspråket ein dag, for å hjelpe meg sjølv til å få det under huda, og inspirere deg til å prøve du òg!

Det høgaste dyret i verda

Sjiraffen er det høgaste dyret i verda, hannane vert omtrent 5 meter høge! Flekkane på pelsen er kamuflasje… Kanskje me kunne prøvd å gøyme Sjiraffen Laffen på avdelinga? Ganske fantastisk at flekkane skal kunne kamuflere eit 5 meter høgt dyr! Mennesket sin hals har sju halsvirvlar, kor mange trur du sjiraffen har? HA!! Han har òg sju, akkurat som meg og deg! Og fordi dei er så store, har dei få fiendar. Når eg tek med meg Sjiraffen Laffen i samlinga, skal eg finne endå meir barnevennleg informasjon om sjiraffen sitt liv. Skal eg dele det med deg?

Magiske samlingsstunder

Og heilt til slutt, må eg fortelle deg kva ei av dei skjønne damene eg jobbar med sa; «Skulle brukt han til å skapa magiske samlingar!;) slik som du er så god på Gudrun!» Kjekt med fine tilbakemeldingar! (Tusen takk Hildegunn!)

Sjiraffen Laffen er utruleg fin å snakke med, han er skikkeleg uttrykksfull, så eg trur nok du får til magiske samlingsstunder med han!

Likar du bloggen? Fint om du deler den vidare med andre <3 Viss du skriv i kommentarfeltet kva du vil bruke sjiraffen til, så er du med i trekkinga av ein <3

Klem,
-Gudrun-

Bloggen er to år!

juli 3, 2014drama, dyr, kreativitet, nettbutikk, oppstart, samlingstipsGudrun

To år går jammen fort, i dag har bloggen gebursdag!

I går henta eg ALLE samlingsboksen-dokkene, og er endeleg klar med trekking av vinnaren av Tre små griser-settet. Og sidan det er gebursdag i dag, trekker eg to vinnarar!

**trommevirvel**

Tone Midttun
Siv Årsvoll Lyngstad

Gratulera!!

La meg presentere deg for Dei tre små grisene og Ulven.

Vann du ikkje?? Hugs at du kan vinne ein sjiraff viss du deler korleis du vil bruke han i samlingsstuda! Har du spesielt lyst på fingerdokkene, så kjem dei i nettbutikken snart!

Klem frå super-glad Gudrun som endeleg fekk alle handdokkene sine!