Min adventskalendar; 10. desember – om klatring og hobbyar

jul

snø

I dag har me greidd å få to festar! Det er avslutning på klatrekurset som eg og 8 åringen har gått på, OG julefest med klassen til 8 åringen. Så det vert ørlite klatrefest og heile klassefesten på oss.

Men kanskje skrive litt om klatring i dag, då? Eg er godt oppi 30 åra, men i haust begynte eg å klatre, 12 meter opp etter ein vegg med sele, heilt frivillig. Eg er ikkje spesielt veltrent, eg er ikkje ein liten røysekatt, men opp i veggen kom eg, og Brattkort fekk eg!

Klatring er kjempe moro! No ønskjer eg meg klatresele til jul, slik at eg kan halde den nye hobbyen min ved like. Me var fire vaksne og 4-5 ungar på kurset, og me var tre + tre frå mitt nabolag. No bur eg relativt urbant og sentralt til, i eit middels stort byggjefelt;

lauvhaug

Jepp, i den vesle krøllen med hus, der alle kjenner alle, bur eg. Me var omtrent halvparten av mødrene i nabolaget på kurs. Ganske so sprekt, eller kva meiner du? (Ok, eg innrømmer det, eg bur i eit knøtt lite byggjefelt 4 km frå eit relativt lite «sentrum») Men eg trivst, så det er det viktigaste.

Hobbyen min dei siste åra, 11-12 åra… har vore barn og hus. Kanskje på tide å begynne med noko eige att? Har alltid hatt ein drøym om å synge i kor, og det har eg gjort tre gonger i mitt vaksne liv, tre Eg kan ikkje syngje-kor-kurs.  Men det har ikkje ført til hopp opp på eit skikkeleg kor. Nokon som har eit super-kor i Sogndal å anbefale? Elles har eg lukta på strikking og symaskin innimellom, men det vert berre periode-greier. Blogging er ein hobby som har vart ei god stund.

Fortel meg om dine hobbyar! Og gi meg idear til ting eg kan teste ut!

(Og viss det er nokon som har tips mot kjempe-forkjøling, så tek eg mot det òg)

Forkjøla klem frå

-Gudrun-

Min adventskalendar; 9. desember – smørkaker

foreldretips, jul

Desse kakene baka me første gong for nokre år sidan, meiner eg fann oppskrifta på eit skravleforum, som var veldig «in» pre-Facebook. Desse er utruleg gode!

snø

Smørkaker
125 g smør
70 g sukker
180 g mjøl

Rør smør og sukker kvitt,
sikt inn mjølet og kjevle forsiktig
til 1 cm tjukk leiv.
Skjær/stikk ut sirklar
og dryss på litt ekstra sukker.
Legg på steikebrett,
set kaldt i 20 min.
Steik på 190 g i 15-20 min.
Avkjøl på rist.

Kos deg! Del gjerne viss du brukar oppskrifta.

Klem

-Gudrun-

Min adventskalendar; 8, desember – om tradisjonar

foreldretips, jul

2. lyset brenn.

No tenner me det andre lys,
det står der stilt å skin.
Me ventar på at Gud vår far,
skal senda sonen sin.

Dette er den sangen me syng når me tenner lys. Det var den me sang heime, og den syng eg saman med ungane mine eigne òg.

snø

Tradisjon er jo det jula handlar om. Kjekt med nytt òg, altså, men når det er jul, så er me vel alle litt tradisjonsbundne? Kva må du gjere til jul?

Eg må ha tomt vaskerom og skifte på alle sengene. (Hender det skjer elles i året òg, altså, men på julafta må det vere). Og me må bake smoltringar. Før, når eg var liten og så lenge som besta mi levde, baka me smoltringar hjå besta og besten. Dei budde nett over oss, og det var alltid «Texas» når me baka. No steiker me smoltringar hjå mamma og pappa, og «Texas» er det fortsatt. Karameller er ein annan tradisjon, det lagar me kvart år.

Lucia skreiv eg om i fjor, det var ein kjær barndomstradisjon. Me gjekk lucia-tog i nabolaget, sang og delte ut lussekattar. I år er Luciadagen på ein fredag, så i år vert det Luciatog på Lauvhaug òg. Luciadagen er ein ting som ofte har måtta vike pga tidspress. Viss me kjem heim i fem tida på ein skuledag, vert det ikkje tid til tog. Men me prøver alltid å bake Lussekattar iallefall.

Ungane har som tradisjon å bake kakemenn saman med svigermor, det er òg alltid koseleg. Då bakar dei saman med søskenbarna sine, og kjem heim med gode kaker.

Kva er det som gjer oss så tradisjonsbundne i jula? Eg høyrer stadig historiar om foreldre som prøver å gjere om på noko når ungane er vaksne, som møter sterk motstand: Det skal vere som det alltid har vore!

Posten kjem seint, men godt i dag. Grunnen er 1. Me har hatt den tradisjonelle smoltring-bakinga i dag og 2. I går fekk eg brev frå legen min at eg hadde husstøvmidd allergi. Så resten av dagen har vorte brukt til å eliminere litt husstøv midd …  Tek gjerne i mot gode tips til korleis eg kan lindre plagene mine.

Førjulsklem frå

-Gudrun-

Min adventskalendar; 7. desember – boksar

boks, foreldretips, jul, kreativitet

Dei to eldste ungane går på speidaren, ein nyoppstarta tropp som har vore i drift i 1,5 år. Kvart år har me juleverkstad, der me blant anna lagar pepperkake leir som me får stille ut i den lokale pepperkakelandsbyen, som er hakket mindre enn den som er i Bergen. (OK, mange hakk mindre.) Men der har iallefall min barnehage, minsten sin barnehage og dei to eldste sin speidartropp eit bidrag, så me er godt representerte.

snø

I fjor lærte me å brette boksar på speidaren sin juleverkstad. Og her kjem oppskrifta eg lova deg i 3. desember-posten.

Me startar med å klippe eit ark, kan godt vere frå eit blad, i eit kvadrat. Slik som når du brettar spå. Brett slik at det vert eit kryss. Brett alle hjørna inn på midten. Ta det så oppatt og brett inn til neste «strek».

boks12

No har du eit «rutemønster» (eg har streka det opp for illustrasjonen sin del, det skal ikkje du gjere). Du må brette ned dei ytterste kantane òg, men dei kan du godt brette andre vegen. Klipp så slik som eg har kryssa, fire klipp.

boks13

Så begynner du og brette til boksen slik som vist på bildet.

boks14

Lykke til! Spør viss det er noko du lurer på. Viss du lagar boksen, er det supert om du anten postar bilde på Facebook-sida eller taggar eit bilde med #samlingsboksen_no og @samlingsboksen på Instagram.

klem,

-Gudrun-

Min adventskalendar; 6. desember – peppermyntegriser

foreldretips, jul

Fredag <3

snø

Det er taco-dagen over alle, også her i heimen. Men i dag vil eg dele ei oppskrift på mintgriser. (Grunnen til at det vart griser, er at me har nokre knøttsmå pepperkake former, der i blant ein gris) Oppskrifta fekk eg hjå Ann Kristin i fjor, min tidlegare Virrevapp.no-sjef.

griser

Ann Kristin sine mint griser
1 dl kremfløyte
1 ss kveitemjøl
Kok til tjukk jevning.
10 dråpar peppermynte + konditorfarge.
Tilset 500 g melis når det er avkjølt.
Kna saman til deig,
kjevle og trykk ut med små
pepperkake-former.
Smelt sjokolade og stryk over figurane.

Dei smakar kjempe godt! Eg skal gi deg oppskrifta på mamma sine mintstenger òg. Julemint er nydeleg!

-Gudrun-

Min adventskalendar; 5. desember – sjokoladekake

foreldretips, jul

Det snøar, Big Time, i Dalen i dag. I går var eg og gutane ute og sklei og laga snølykter (som vart både nedsnødde og vekkbrøytte, men det er ikkje nøye). Eg og minsten som har fri frå barnehagen i dag, bakar sjokoladekake (som står nedom her) og skal ein tur ut og brøyte før me skal på Tae Kwondo gradering!

Så i dag heiar eg på mellom guten i familien. Han er 8 år og skal graderast i tae kwondo i dag! Hurra!

snø

Då er det på plass med ei enkel platekake, som er rask og enkel. Takk til Karin, som var styraren min i gamle dagar for den geniale oppskrifta!

Langpannekake
6 koppar mjøl
4 koppar sukker
4 egg
2 koppar mjølk
300 gram smelta smør
3 ts bakepulver
3 ts vaniljesukker
2 ss kakao
Bland alt, rør kun med visp, ikkje mixmaster.
Steik på 180 grader i 30 min.

SJOKOLADEKAKE

Ferdig kake

Kaffi og sjokolade

Prøvesmaking…

Denne er grei å ty til når du skal ha bake-dugnad, t.d. til tae kwondo-gradering og slikt. Og viss du brukar o’boy i glasuren istaden for kakao, vert den lys og fin – så veit du det 😉

Hugs å nyte førjulstida. (Eg innrømmer glatt at førjulstida skjeldan vert koseleg for meg, eg stressar som ein gal. Men i år er eg tidleg ute 😉 Prøver eg stadig å overbevise meg sjølv om – i god NLP-ånd)

-Gudrun-

snø

Utsikten frå stoveglaset i dag tidleg, koseleg å sitte inne og sjå på snøen med kaffikoppen og vite at du ikkje treng køyre bil på Dalavegen i dag 😉

Min adventskalendar; 4. desember – rundstykker 1

foreldretips, jul

I dag fyller eg opp frysen med rundstykker. Kjekt å ha heimebakt til julefrukostane.

snø

Begynner med oppskrifta frå Bestemor <3

Eg var so heldig at eg hadde besteforeldre på verdas vakraste øy, Bømlo. Kvar gong me kom til Lykling, fekk me desse gode rundstykka. Dei smakar best med rørt jordbærsyltetøy 😉 (Jepp, barndomsminne <3 )

 Bestemor sine rundstykker

1 l mjøl
1 ts salt
4 dl mjølk
4 barneskreier sukker
4 ss smør
1 pk gjær

 Smelt smør, ha den i mjølka. Rør gjæren ut i sukkeret.
Bland alt og rør forsiktig, ingen elting.
Trill ut lange pølser som kuttast opp i ca 32 stk.
Set ferdig trilla bollar til heving i ca to timar. (Ingen forheving)

 Steik i ca 10 min 200-225 grader

Bestemor bakte som sagt desse som me fekk til frukost, då eg var 12 år gammal, døde ho. Bestefar var enkemann i 16 år, men held tradisjonen ved like. Ganske imponerande av ein mann på 76 år.

Takk for gode minner <3

-Gudrun-

Min adventskalendar; 3. desember – juleverkstad

boks, foreldretips, jul, kreativitet, vinter

I dag trur eg rett og slett det vert julemusikk, julekaker og julegodis frå 1. og 2., gløgg og juleverkstad med mine tre små/store. Me har funne fram glanspapir og perlebrett og skal lage julepynt.

snø

Det er koseleg å ha både små og store ungar saman. Dei store kan lage litt meir utfordrande pynt, og dei kan hjelpe dei små.

Desse papirstjernene til BareBeppe har gått som ein farsott på instagram. Dei er kjempe enkle, og svært dekorative.

juleverkstad1

Slik ser det ut på bordet når me startar.

juleverkstad2

Men det eskalerer fort.

juleverkstad3

Her er litt av resultatet; ein boks, eit kort og tre deler til stjerna.

Det vart fem av BareBeppe sine stjerner, to boksar (kjem forklaring i ein seinare post), 4 julekort og sikkert noko meir som eg ikkje kjem på.

(Eg skal vere ærleg; me gjorde dette i går 😉 For å få med bilder ligg me ein dag føre. Tysdagar er ikkje dagar der me har tid til noko ekstra. Ungane kjem att med skulebussen kl 15, og me skal gjere lekser, levere veslebror til barnevakt og komme oss på trening til kl 17. Storesøster har tae kwondo-trening, mens eg og storebroren har, som eg muligens har sagt noko om før…, klatring. No er det øyeblikkeleg Bratt-kort på a’ mor!)

Kos dykk i førjulstida. Juleverkstad er kjempe moro, iallefall etter at me har lagt den yngste 😉 Kva lagar du til jul?

-Gudrun-

Min adventskalendar; 2. desember – sjokolade karameller

foreldretips, jul

Så var det måndag. Eg delte karamell-oppskrifta mi i fjor, og tenkte at eg skulle gi deg jenta mi si oppskrift i dag. Kjempe gode, og heilt annleis enn mine. Desse vert meir sprø og smeltar på tunga.

snø

Hilde sine karameller

210 g sukker
210 g glukose (apoteket)
30 g smør
3,3 dl fløyte
50 g sjokolade
Kok sukker, glukose, smør og fløyte til den er lysebrun,
rør med visp.
Ta gryta av plata og tilset sjokoladen.
Rør godt og hell straks over på matpapir.
Kutt i bitar når den er kald.

I desember kosar me oss, det er greit! Viss du prøver oppskrifta, fortel oss korleis det gjekk! Sant det vart gode karameller?

Kos deg i adventstida <3

-Gudrun-

Min adventskalendar; 1. desember – italienske julekaker

foreldretips, jul

Det er søndag, og første lyset er tent. (Viss du har funne att staken frå i fjor, vel og merke…)

Eg har ligg godt an i år, pga. stæroperasjonen har eg vore heime frå jobb, og dilla litt då. (Ikkje sant i det heile teke, eg ligg aldri godt an til noko som helst…)

snø

Så desember skal brukast til førjulskos i år <3 Har plan om det kvart år, å bruke desember til kos, og her kjem min 1. desember idè;

Eg fekk smake nokre fantastisk gode italienske julekaker på ein førjulsfest på skulen, så her kjem oppskrifta på desse <3

deig

Sarah sine julekaker

250 g mjøl
125 g smør – mjukt, smuldre
110 g sukker, ha i mjøl/smør
1 egg + ei ekstra plomme
Ha i mandel, hasselnøtt og sjokolade.
Deigen skal vere fast, la stå kaldt i ein time.
Kjevle ut og stikk ut kaker med pepperkakeformer.
Steik på 150 g til dei har fått farge.

Eg prøvde desse i fjor, mine vart ikkje så gode som dei eg smakte, men det trengs vel litt prøving og feiling før ein finn den rette blandinga med nøtter og sjokolade.

italienske julekaker

Nyt førjulstida, viss du prøver oppskrifta, fortel meg kva du tykkjer! 😀

-Gudrun-